Lorenc Trashi u shpall futbollisti më i mirë i vitit në Kategorinë Superiore, ose siç quhet ndryshe, Topi i Artë për vitin 2018, një çmim që duket se ka befasuar edhe vetë anësorin gramshiot.
Në intervistën e dhënë për Supersport, pas marrjes së çmimit, futbollisti i Partizanit pranoi se ishte befasuar, ndërsa theksoi se tashëm synon që të fitojë edhe titullin kampion me “të kuqtë”.
“Meqë mora këtë trofe, dua ta mbyll edhe me një tjetër, duke fituar kampionatin. Këtë vit kampionati është shumë i fortë, dhe titullin e fiton skuadra që do bëjë më pak gabime. Këtë çmim nuk e prisja, u surprizova. Ndihem shumë i vlerësuar. Ky është viti im i pestë te Partizani, dhe çdo vit është folur për një transferim të mundshëm jashtë, por nuk është bërë asgjë. Këtë gjë e ka në dorë presidenti, unë do vazhdoj të jap maksimumin për Partizanin”, deklaroi Trashi.