Data 25 maj është e një rëndësie të veçantë për Tiranën, kryeqytetin e Shqipërisë që do të mirëpresë finalen e Conference League. Në Air Albania, Roma dhe Feyenoord do të diskutojnë trofeun më të ri europian, ndërsa interesi është tejet i lartë për vetë traditën e dy klubeve.
Pritet që në Tiranë të mbërrijnë deri në 100.000 njerëz, tifozë nga të dyja kampet ndërsa frika është e një përplasje mes ultrasve italianë dhe holandezë. Në fakt, të dyja tifozeritë kanë një precedent të mëparshëm teksa në vitin 2015, tifozët e Feyenoord shkaktuan trazira në Romë duke shkatërruar qendrën historike të qytetit.
Ndaj, agjencia e famshme e lajmeve, “Associated Press” i frikësohet një tjetër përplasjeje të ultrasve, këtë herë në Tiranë. E gjitha nis nga një “ftesë” aspak miqësore e tifozëve romanë në rrjetet sociale për holandezët duke kërkuar një lloj hakmarrje për atë që ka ndodhur shtatë vite më parë, teksa autoritete shqiptare janë të paralajmëruara.