Ousmane Dembele, Frenkie De Jong por edhe Ansu Fati janë tre nga emrat më të lakuar sa i përket merkatos në dalje te Barcelona. Megjithatë, është presidenti Joan Laporta ai që mendon për të shuar zërat e merkatos kur vjen puna te tre nga talentët më të spikatur në radhët e katalanasve.
Numri një i klubit blaugran theksoi se Dembele nuk e shet as në rast se mbërrin një ofertë prej 70 apo 80 milionë eurosh ndërsa për De Jong shtoi se klubi ka vendosur të mos e nxjerrë në merkato.
“Dembele nuk e shesim edhe në rast se mbërrin një ofertë 70 apo 80 milionë euro. Ne po mendojmë për të rinovuar me atë dhe të shohim, do të flasim më shumë në të ardhmen. Sa i takon De Jong, edhe kryesia sportive merr vendimet e saj dhe ndërmerr veprime, është vendosur që mesfushori të mos jetë në merkato. I njëjti diskutim vlen edhe për Ansu Fati. Sa i takon merkatos së janarit, ideja është të mos shpenzojmë në këtë moment pasi skuadrën e krijuam në verë”, u shpreh Laporta.
