Trepça ’89 pësoi humbjen e parë në IPKO Superligën e Kosovës në transfertë ndaj Ballkanit. Skuadra e drejtuar nga Shpëtim Idrizi u kujtua vonë të reagonte, pasi edhe pse realizoi 2 gola në pjesën e dytë, nuk arriti të shmangte disfatën, teksa formacioni i drejtuar nga Ismet Munishi kishte shënuar 3 herë deri në minutën e 50-të.
Të dyja skuadrat dhuruan emocione në prani të një numri të madh shikuesish në stadiumin e Therandës.
Mitrovicasit e morën goditjen e parë, pa u mbushur 60 sekonda lojë, pasi sulmuesi nga Peqini i Shqipërisë, Artur Magani zhbllokoi rezultatin pa u nxehur mirë muskujt.
Vetëm 12 minuta më vonë Baftiu i dha epërsinë e dyfishtë Ballkanit, ndërsa 10 minuta pas fillimit të pjesës së dyta Hoxha shpërtheu në zonë duke realizuar golin e 3-0.
U duk se gjithçka u mbyll, por pas shtatë minutash Manaj ngushtoi në 3-1 diferencën me 11-metërsh, pasi një ndërhyrjeje naive në zonë. I njëjti autor e tundi për herë të dytë rrjetën në minutën e 81-të, por nuk pati më ndryshim tjetër rezultati, edhe pse Trepça ’89 provoi me të gjitha mënyrat për të shmangur humbjen, por pa ia dalë mbanë.
Ballkani me këtë fitore ngjitet i vetëm në krye me 8 pikë.