Fitore jetike për Dukagjinin dhe Trepça ’89 në kampionatin e Kosovës. Skuadra nga Klina mposhti 4-0 Malishevën. Iljasa Zulfiu zhbllokoi takimin në pjesën e parë, ndërkohë që vendasit kompletuan suksesin me “poker” falë rrjetave të nigerianit Otto John, Altin Merlakut dhe Blerind Morinës në pjesën e dytë.
Fitorja e sotme e ka ngjitur Dukagjinin në kuotën e 15 pikëve, duke barazuar Malishevën dhe Trepça ’89, që mposhti 1-0 Drenicën në Mitrovicë. Armend Gashi realizoi golin e fitores për Trepçën 10 minuta përpara fundit të takimit, teksa më pas la ekipin e tij pas daljes me karton të kuq (festoi duke hequr fanellën dhe u ndëshkua me kartonin e dytë të verdhë).
Drita vazhdon të kryesojë kampionatin dardan të futbollit me 30 pikë. Në vend të dytë renditen kampionët e Ballkanit me katër pikë më pak, por djemtë e Ilir Dajës kanë zhvilluar tri ndeshje më pak se “Intelektualët”.