Trajneri i Flamurtarit Marcelo Troisi, në intervistën e dhënë për emisionin “Gol pas Goli” në Supersport, u shfaq mjaft i kënaqur për paraqitjen e të tijve dhe mbi të gjitha për fitoren e thellë 6-1 ndaj Luftëtarit.
“Kam punuar këtë javë goxha mirë me sulmin përpara. Në të gjitha ndeshjet kemi punuar fort, madje edhe me Partiznain, por nuk patëm fat të shënonim. Edhe sot besova që ekipi mund të shkonte shumë mirë dhe për fat ia dolëm të shënojmë 6 gola”, u shpreh trajneri.
Me Flamurtarin në Kategorinë e Parë, e ardhmja e trajnerit brazilian duket e paqartë, pasi siç shprehet edhe ai vetë, Administratori Sinan Idrizi nuk i ka dhënë garanci për sezonin e ardhshëm dhe se gjithçka pritet të vendoset në fund të sezonit.
“Nuk e di akoma. Nuk mund të jap akoma përgjigje, pasi presidenti nuk ka vendosur akoma. Është një vendim që i përket presidentit. Do të jap gjithçka për skuadrën deri në fund të sezonit dhe më pas të shohim”, tha Troisi.