Flamurtari vijon të respektojë kampionatin dhe të japë maksimumin në çdo ndeshje, ndërsa sot u mposht vetëm në sekondat e fundit ndaj Bylisit, me rezultatin final 2-3.
Megjithatë në Vlorë nuk munguan polemikat, për një sërë vendimesh të dyshimta të arbitrit kryesor Blerim Ziri, ndërsa kulmi arriti kur ky i fundit akordoi 5 minuta shtesë, por la lojën të luhej deri në minutën e 97’, kur edhe Bylisi shënoi.
Një humbje e dhimbshme në minutat e fundit të ndeshjes, e cila shkaktoi edhe nervozizëm…
Është një ndeshje jo normale, por më vjen keq pasi djemtë luajtën shumë mirë dhe na penalizoi arbitri. Dha 5 minuta shtesë, por e la lojën të luhej për 8 minuta, deri sa shënoi Bylisi. Pashë edhe rastin e penalltisë në televizor dhe qartazi nuk kishte faull. Nuk e kuptova sjelljen e tij, duke dhënë kartonë të verdhë dhe faulle të paqenë.
Mos ndoshta kjo ndodh pasi Flamurtarin e shikojnë si të rënë tashmë në Kategorinë e Parë?
Nuk e di çfarë të them për arbitrat, por unë punoj çdo ditë për të përmirësuar skuadrën dhe për të bërë një lojë sa më të mirë. Kemi luajtur mirë dhe kjo është ajo që ka rëndësi për mua.
A mund të ruhet ky ekip edhe për sezonin e ardhshëm dhe a mund të rikthehet menjëherë në Superiore?
Nuk e di akoma, pasi do të presim edhe këto 3-4 ndeshje, para se të flas me presidentin. Flamurtari është një emër shumë i madh në futbollin shqiptar dhe mendoj se duhet të rikthehet sa më shpejt në Superiore.
