Lajm tronditës për ish-porterin e Realit të Madridit dhe të përfaqësueses së Spanjës, Iker Casillas, aktualisht pjesë e Portos në Portugali.
Sipas informacionet që vijnë nga mediet luzitane, 37-vjeçari është shtruar me urgjencë në një spital të qytetit Oporto, për shkak të një ataku kardiak.
Klubi i Portos e konfirmoi lajmin e tmerrshëm për TVI, ku sqaronte se gjendja e spanjollit është e qëndrueshme dhe po shkon drejt përmirësimit. Casillas ka ndier shqetësime në zemër gjatë seancës stërvitore të paradites dhe është transportuar menjëherë në spital, ku i është nënshtruar një ndërhyrjeje kirurgjikale.
“Iker ka pësuar një infarkt të miokardit gjatë stërvitjes në mëngjes. Stërvitja u ndërpre menjëherë për t’i ardhur në ndihmë portierit, i cili në këto momente ndodhte në spitalin e CUF të Oportos. Është mirë dhe gjendja e tij shëndetësore është e stabilizuar. Problemi kardiak është zgjidhur”, shkruhet në njoftimin e klubi portugez.
Pavarësisht relativizimit të situatës nga Porto, është e qartë që portieri i famshëm spanjoll e ka mbyllur sezonin, ndoshta edhe karrierën.