Skuadrat shqiptare që do të garojnë në eliminatoret e Kupave të Europës vijojnë fazën përgatitore, teksa Teuta, Partizani dhe Vllaznia kanë zbritur sot në fushë edhe për teste miqësore.
Kështu durrsakët zhvilluan një ndeshje miqësore përballë maqedonasve të Sileksit dhe ia doli të triumfojë me rezultatin minimal 0-1, falë një goli të fantazistit Emiliano Vila në pjesën e dytë të takimit.
Ndërkohë Partizani u përball me skuadrën e Strugës dhe nuk shkoi dot përtej barazimit 1-1, teksa goli për të kuqtë e Ilir Dajës u shënua nga braziliani Cardoso. Vlen të theksohet se nga minuta e parë u aktivizuan edhe Marku e Shehi, që janë afruar rishtazi te kryeqytetasit.
Me rezultatin e barabartë 1-1 përfundoi edhe miqësorja mes Sutjeskës dhe Vllaznisë, e zhvilluar ne Zlatibor të Serbisë. Vendasit kaluan në avantazh me Markovic, ndërsa shkodranët gjetën barazimin me Haris Dilaver, që shënoi nga pika e bardhë.