Pas 15 vitesh tërheqje nga boksi dhe me 54 vite mbi supe, Mike Tyson është gati të rikthehet në ring dhe do ta bëjë këtë në orët e para të ditës së diel, për t’u përballur me 51-vjeçarin amerikan Roy Jones.
Në një intervistë të dhënë së fundi, “Majku i hekurt” deklaroi se po stërvitet shumë mirë dhe se ka hequr dorë nga të qenit vegan, pasi nuk arrinte të plotësonte nevojat e trupit të tij pa konsumuar mish.
“Kam hequr dorë nga dieta vegane për të përballuar stërvitjet e ngarkuara, të cilave po u nënshtrohem së fundi. Ajo dietë nuk më jepte forcën, energjinë dhe rezistencën e duhur për të përballuar angazhime të tilla. Tani ha vetëm mish, mundësisht dreri dhe bizoni, dhe them se jam plotësisht në formë”, u shpreh boksieri 54-vjeçar.
Përballja mes Mike Tyson dhe kampionit tjetër të boksit, Roy Jones, do të zhvillohet në orën 3:00 të mëngjesit të së dielës (ora lokale në Shqipëri), në “Staples Center”, që është njëkohësisht edhe “shtëpia” e kampionëve aktualë të NBA-it, Los Angeles Lakers.
Ndeshja mes dy boksierëve, që të dy së bashku kanë 105 vite jetë, do të zhvillohet me 8 raunde nga dy minuta dhe është më e diskutuara aktualisht në Shtetet e Bashkuara të Amerikës dhe jo vetëm, ndërsa arbitri Ray Corona ka garantuar se do ta ndërpresë atë, nëse sheh që shndërrohet në një përballje të vërtetë boksi.