Dënim mjaft i rëndë për 4 lojtarë të kombëtares japoneze të basketbollit, të cilët janë skualifikuar për 1 vit, pas skandalit në Lojërat Aziatike javën e kaluar.
Lojtarët Takuma Sato, Nagayoshi Yuga, Takuya Hashimoto dhe Keita Imamura, e kishin tepruar me festimin e tyre në qytetin e Xhakartas të Indonezisë, ku janë kapur në një lokal nate me 4 prostituta. Madje ata ishin të gjithë të veshur me uniformën e kombëtares së tyre, që me siguri e ka bërë më të lehtë për t’u dalluar.
Reagimi i federatës japoneze ishte i menjëhershëm. Vetë kreu i basketbollit në vend, deklaroi se sjellja e lojtarëve ishte e papranueshme, duke zhgënjyer të gjithë besimin e botës së sportit dhe jo vetëm, në Japoni.
Ndërkohë lojtarët kanë kërkuar falje publike, duke shoqëruar fjalimin e tyre me shumë përulje. E vetmja gjë që ata kanë arritur të marrin, është stërvitja me shokët e skuadrës gjatë këtij sezoni, edhe pse nuk do të kenë mundësi të luajnë.
