Sulmuesi i Turqisë, Cenk Tosun gjatë miqësores me Tunizinë, që u zhvillua në Gjenevë dhe që përfundoi 2-2, u bë protagonist i një gjesti aspak të hijshëm kundrejt një tifozi, të cilin e kërcënoi, duke i bërë shenjën e prerjes së fytit. Menjëherë pas golit të barazimit në minutën e 57-të nga lojtari i Tunizisë, Badri, 26-vjeçari, që aktivizohet me Everton, reagoi ashpër ndaj disa tifozëve, duke i kërcënuar me prerje fyti. Ky gjest i kushtoi futbollistit turk menjëherë kartonin e kuq. Tosun u justifikua se gjesti ndaj tifozit erdhi si pasojë se disa mbështetës i kishin sulmuar babain dhe xhaxhain, të cilët ndodheshin në stadium për të ndjekur ndeshjen.