Pasi shkëputi marrëdhëniet me mirëkuptim me trajnerin Bekim Shotani, Llapi ka arritur marrëveshje me trajnerin e mirënjohur nga Maqedonia, Djengis Redjepi, i cili do ta drejtojë skuadrën nga Podujeva deri në fund të sezonit.
Djengis Redjepi, 36 vjeç, i lindur më 08.07.1982 në Tetovë, është trajner i licencuar me “UEFA A Pro”. Para se të emërohej kryetrajner i Llapit, Redjepi ishte ndihmëstrajner te skuadra e Sivassporit në Turqi, dhe mban gjithashtu postin e ndihmësselektorit në përfaqësuesen e Maqedonisë.
Redjepi premtoi punë profesionale, disiplinë dhe përkushtim për të arritur objektivat të cilat i ka Llapi dhe tha se ndihet i nderuar që do mbajë postin e kryetrajnerit të një klubi të madh siç është Llapi. Po ashtu ai kërkoi përkrahje maksimale nga simpatizuesit e klubit në të gjitha ndeshjet, që rruga drejt titullit kampion të jetë më e lehtë dhe e arritshme.
