Vetëm pak ditë më parë Kukësi vendosi të lërë të lirë sulmuesin anësor Enis Gavazaj, duke qenë se ky i fundit nuk bënte pjesë në planet e Skënder Gegës, megjithatë 25-vjeçari ka gjetur menjëherë një tjetër klub për të vijuar karrierën.
Kështu futbollisti nga Zhuri i Prizrenit është rikthyer në IPKO Superligën e Kosovës dhe pikërisht te skuadra e Prishtinës, ku ka luajtur deri në verën e 2013-ës, para se të transferohej te belgët e Gentit.
Merkatoja në Kosovë është mbyllur, por për Prishtinën nuk ishte e vështirë të federojë Gavazajn, i cili ishte një lojtar i lirë dhe sot u prezantua zyrtarisht me fanellën e klubit kryeqytetas.
Prishtina bën kështu një tjetër goditje të madhe, pasi ka arritur të marrë më herët emra si Sabien Lilaj, Gledi Mici dhe Gentjan Muça, emra këta që i kanë dhënë shumë futbollit në Shqipëri dhe kanë eksperiencë të madhe mbi supe.