Federata e Futbollit të Rusisë ka hequr dorë nga apelimi kundër pezullimit të përfaqësueses në Kupën e Botës, që FIFA e vendosi pas nisjes së agresionit rus në Ukrainë. Federata e Futbollit të Rusisë kishte protestuar kundër vendimit të qeverisë së futbollit botëror, por Gjykata e Arbitrazhit Sportiv (CAS) thotë se ajo tashmë e ka tërhequr apelimin.
Rusia ishte kualifikuar për t’u përballur me Poloninë në një gjysmëfinale të play-off-it, por polakët kaluan direkt në finale dhe eliminuan Suedinë për të prerë biletën për në Katar.
Megjithatë, Rusia do të vazhdojë të luftojë për të hequr pezullimet nga kompeticionet e tjera, siç është ndalimi i Sprtarkut të Moskës për të vijuar rrugëtimin në Europa League.
UEFA e ka ndaluar gjithashtu kombëtaren ruse të femrave të garojë në “Euro 2022” në Angli, këtë verë, pasi një numër vendesh kanë refuzuar të konkurrojnë kundër kësaj përfaqësueseje.
Finalja e Ligës së Kampionëve 2022, që fillimisht do të luhej në Shën Petërsburg më 28 maj, është zhvendosur në Paris.
Rusia gjithashtu ka kërkuar anulimin e pezullimit të saj në gjimnastikën ndërkombëtare, regbi, vozitje dhe patinazh.