Humbja e fundit në kampionat ka bërë që drejtuesit e Udineses të shkarkojnë trajnerin Luca Gotti dhe t’ia besojnë skuadrën përkohësisht ndihmësit të tij, Gabriele Cioffi.
Megjithatë mediat pranë klubit friulian bëjnë me dije se drejtuesit e bardhezinjve po negociojnë me spanjollin Paco Jimenez, i cili mund të zyrtarizohet brenda kësaj jave dhe të nisë menjëherë nga puna.
Spanjolli 51-vjeçar ka luajtur me disa skuadra në La Liga, teksa me familjen Pozzo është njohur kur drejtonte Granadën, një tjetër klub që ishte në pronësi të italianëve deri në 2016-ën dhe palët ruajnë respekt reciprok për njëra-tjetrën.
Paco Jimenez është i papunë që prej verës së 2020-ës dhe mirëpret një eksperiencë në Serinë A, pikërisht te Udinese, ku pak vite më parë dështoi spanjolli tjetër, Julio Velasquez.
