Pas shumë thashethemeve, më në fund vjen vërtetimi. Federata Evropiane e Futbollit (UEFA) përmes një letre elektronike dërguar në adresën e SuperSport News, ekskluzivisht ka konfirmuar ndeshjen miqësore mes Kosovës dhe Danimarkës, që do të zhvillohet më 21 mars në Prishtinë, vetëm 4 ditë para fillimit të fushatës së kualifikimeve për Kampionatin Evropian 2020.
Presidenti i Federatës së Futbollit të Kosovës, Agim Ademi ka bërë të ditur që kanë mbetur të finalizohen disa gjëra logjistike me Federatën e Futbollit të Danimarkës. Kujtojmë që skandinavët kanë qenë një nga 4 kundërshtarët e mundshëm për këtë ndeshje miqësore, duke qenë se nga 21-24 mars, të lira nga ndeshje kualifikuese ishin Gjermania, Uellsi dhe Serbia.
Për trajnerin Bernard Challandes, Danimarka do të jetë test shumë i rëndësishëm për të matur forcat, pas suksesit në Nations League. Kombëtarja e drejtuar nga Age Hareide, ishte pjesë e kampionatit botëror të Rusisë, ku u eliminua nga Kroacia në 1/8-ën e finales, ndërsa në Nations League, ishte pjesë e Ligës B, duke fituar grupin kundër Uellsit dhe Irlandës.
