Uruguai e mbyll grupin C në vendin e parë dhe eviton përballjen me Kolumbinë në çerekfinalet e Copa America 2019-të. Në mitikun Maracana në Rio De Janeiro, kombëtarja abliceleste tregoi forcën ndaj Kilit duke triumfuar me një gol të vonë në minutën e 82-të të Edinson Cavanit finalizim që ngjiti Uruguain në vendin e parë me 7 pikë dhe zbriti Kilin në të dytin me 6 pikë. Oscar Tabarez kishte bërë disa ndryshime në formacionin titullar gjithsesi emrat e peshë si Godin, Gimenez, Bentancur, Suarez e Cavani ishin në fushë që nga minuta e parë. Në krahun tjetër trajneri i Kilit kishte lënë pushim Arturo Vidal dhe Mauricio Islan. Ishte një lojë deri diku e barabartë madje kilianët kërkuan diçka më shumë por në fund nuk arritën të ruanin dot as barazimin që do t’u mjaftonte për kreun e grupit por u ndëshkuan nga goli i Cavanit.
Në sfidën tjetër të këtij grupi mes Ekuadorit dhe Japonisë, “fitoi” Paraguai. Vetëm barazimi mes këtyre dy skuadrave kualifikonte në çerekfinale Paraguian si e treta e dytë më e mirë e të gjitha grupeve dhe kështu ndodhi Ekuadori dhe Japonia e mbyllën me shifrat 1-1 sfidën mes tyre duke bërë që paraguianët të shpërthenin në festë. Golit të shpejtë të Nakajimas në minutën e 15-të iu përgjigj Mena Delgado në të 35-ën dhe deri në fund rezultati mbeti i pandryshuar.