US Open ka përmbyllur fazën çerekfinale për meshkuj dhe femra. Kei Nishikori ka aritur të fitojë kundër Marin Cilic 3-2, në një ndeshje që zgjati 4 orë e 12 minuta. Ndeshja filloi në mënyrën më të mirë për kroatin, i cili fitoi setin e parë 6-2. Gjithsesi, japonezi Nishikori përmbysi gjithçka, duke fituar dy setet e rradhës 6-4 7-6. Por, Cilic nuk u dorëzua duke fituar setin e katërt me rezultatin 6-4, e rrjedhimisht duke e çuar lojën në një set final. Në këtë set, Nishikori u tregua më i saktë duke arritur ta fitojë 6-4 e gjithë takimin. Në gjysmëfinale, japonezi do të përballet me Novak Djokovic, i cili fitoi pa shumë probleme kundër australianit Millman, që në raundin e shkuar mundi legjendën e tenisit botëror, Roger Federer.
Djokovic arriti të fitojë me rezultatin 6-3 6-4 6-4, duke mos i falur asnjë set Millman.
Për sa i përket tenisit të femrave, talentja 20 vjeçare Naomi Osaka, arriti të fitojë kundër ukrainases Tsarenko, duke humbur vetëm 2 game në të gjithë takimin, i cili u mbyll për 1 orë. Në gjysmëfinale, japonezja do të përballet me amerikanen Madison Keys. Edhe kjo e fundit arriti të fitojë me rezultatin 6-4 6-3 kundër spanjolles Suarez Navarro.
US Open pritet të dhurojë emocione të tjera, ku dalëngadalë po hyn në fazën më të nxehtë.