US Open vazhdon të dhurojë emocione të forta. Në raundin e tretë, tenistët favoritë ja kanë dalë të kualifikohen për në fazën e 1/8. Rafael Nadal mundi me shumë vështirësi rusin Khachanov 5-7 7-5 7-6 7-6, në një ndeshje që zgjati 4 orë e 25 minuta. Khachanov nuk u dorëzua për asnjë moment, por Nadal me përvojën e tij, ja doli të fitojë ndeshjen e të kualifikohet për në fazën tjetër. Në ndeshjen e ardhshme, spanjollin e pret gjeorgjiani Basilashvili.
Fitore arritën dhe Kevin Anderson e Juan Martin Del Potro. Anderson vuajti kundër talentit kanadez Denis Shapovalov, por gjithsesi arriti ta fitojë ndeshjen 3-2 me sete. Disi më të thjeshtë e pati Del Potro, i cili mundi 3-0 Fernando Verdascon në një ndeshje e cila zgjati rreth 3 orë.
Për sa i përket femrave, ndeshja më interesante ishte ajo mes motrave Williams, që u dominua krejtësisht nga motra e vogël Serena. Venus Williams nuk hyri asnjëherë në ndeshje, duke fituar vetëm 3 game gjithsej. Për sa i përket Serenës, në raundin e ardhshëm do të përballet me estonezen Kanepi, e cila mundi suedezen Peterson. Fitore gjithashtu për numrin 8 në botë, Karolina Pliskova. Tenistja çeke mundi amerikanen Kenin 6-4 7-6, takim i cili zgjati 2 orë.