Në Spanjë është momenti i Valladolidit, skuadra që zotërohet në 51% të aksioneve nga Ronaldo “Fenomeni”. Ndoshta nuk është rastësi që edhe ecuria e kësaj skuadre në javët e fundit mund të etiketohet thjesht fenomenale. Katër fitore radhazi, e fundit 0-1 në fushën e Betis Sevillas, me skuadrën që drejtohet nga trajneri Sergio Gonzales që katapultohet në vendin e 6-të.
Edhe goli i shënuar nga Valladolidi ishte për manual. Një harkim i saktë i Tonit dhe një goditje me të parën e Antuanitos, që përfundoi në rrjetë.
Andaluzët bënë shumë pak për ta kthyer ndeshjen, e sigurisht merita shkon për skuadrën mike që ishte tepër e disiplinuar në mbrojtje dhe e gatshme për të dhënë goditjen përfundimtare, edhe pse nuk qe e nevojshme për të shënuar një tjetër gol për të marrë fitoren. Për Betisin kjo ishte humbja e dytë radhazi me të njëjtin rezultat, pas disfatës me Atleticon në “Wanda Metropolitano”.