Është dita e Valon Berishës te Lazio. Fantazisti i përfaqësueses së Kosovës ka kryer testet mjekësore tek bardhekaltërit duke u prezantuar si afrimi i 3 në këtë periudhë merkatoje. E tërë vëmendja është në festën futbollistike të mbarë globit, kampionati Botëror në Rusi por Lazio dhe Igli Tare vijojnë të punojnë, ashtu siç kanë bërë gjatë të gjithë këtyre viteve. Drejtori sportiv i kryeqytetasve ka marë një futbollist me potencial të jashtëzakonshëm por mbi të gjitha ka fituar duelin në distancë me Sampdorian, klubi i cili u përfol se ishte shumë pranë firmës me 25- vjeçarin. Që në orët e para të mëngjesit Valon Berisha i shoqëruar nga vëllai i tij, Vetoni sulmues i Rapidit të Vienës i është nënshtruar vizitave mjekësore për të zyrtarizuar mbylljen e këtij operiacioni, kosto e të cilit detyron klubin italian të derdhë 7.5 milionë euro në arkat e klubit austriak të Red Bull Salzburg, ndërkohë që vetë lojtari do të përfitojë 1.5 milionë euro në sezon plus bonuse, për një kontratë me afat 5–vjeçar. Ky është një afrim që plotëson grupin në dispozicion të Simone inzaghit që tashmë ka në përbërje një mesfushor më shumë, me zyrtarizimin në kanalin e klubit që pritet të bëhet ditën e dielë.
