Federico Valverde është shndërruar në këtë sezon një lojtar shumë të rëndësishëm për Real Madrid dhe trajnerin Carlo Ancelotti. Uruguajani mbulon shumë pozicione në fushë, ka grintë dhe ndër të tjera, këtë sezon ka gjetur edhe golat duke ndihmuar Los Blancos të ruajnë perfeksionin në këtë sezon teksa spanjollët i kanë fituar të gjitha ndeshjet e luajtura deri më tani.
Në këtë formë, Valverde ka bërë të harrohet edhe një si Casemiro që u transferua të Manchester United, ndërkohë që për lojtarin e madrilenëve flet me superlativa edhe Luis Suarez. Ish-sulmuesi i Barcelonës thekson se patriotin e tij e ka zbuluar që në vitin 2017 gjatë një ndeshje me kombëtaren e Uruguajit ndërsa shton se Valverde i ngjan Steven Gerrard.
“Nëse doni mund të gjeni arkivat e disa gazetave, unë e di për Valverden që në vitin 2017. Në atë kohë ai debutoi me Uruguajin dhe unë menjëherë sapo e pashë, e krahasova me Steven Gerrard. E njihja mirë edhe Gerrard pasi luanim te Liverpool dhe krahasimin nuk e bëra më kot.
Valverde ka shumë karakteristika të ngjashme me Gerrard, i pëlqen të marrë iniciativën, ka një goditje shumë të mirë, ndryshon ritmin e lojës si dhe vrapon shumë në fushë. Valverde ka bërë një progres të madh dhe fakti që ka qenë i rrethuar nga yje, e ka ndihmuar shumë të rritet”, u shpreh Suarez.
