Flamurtari pret Skënderbeun, një ndeshje jo si vite më parë kur kishte një rivalitet të ndezur për titullin, por ama në Vlorë duan 3 pikët. Në mikrofonin e “Supersport”, në prag të kryesfidës me korçarët, ka folur njëri nga titullarët e skuadrës vlonjate, nga të paktit që ka qenë pjesë e kuqezinjve kur rivalizonin me Skënderbeun për kreun. “
“Është një ndeshje vitrinë për kampionatin shqiptar dhe ne synojmë që të jemi në vendet e para të renditjes. Duam pikët dhe një lojë bindëse. Luajmë para tifozëve dhe duhet që ta fitojmë këtë ndeshje”, -tha fillimisht Veliu.
Franc Veliu ka besim se me mbështetjen e tifozëve, Flamurtari do të jetë më i fortë në këtë përballje shtëpie. “Shpresoj që tifozët të jenë të shumtë në numër në ndeshjen ndaj Skënderbeut. Vlonjatët, aq më tepër në një ndeshje si kjo me Skënderbeun do të na mbështesin maksimalisht”.