Vëllezërit Hazard duket se po shijojnë një nga momentet e tyre më të mira në futboll. Ndërsa Eden, ylli i Chelseas kërkohet me ngulm nga gjigandët e Europës, Real Madrid, edhe vëllai i tij më i vogël, Thorgan Hazard duket se do të ndjekë hapa të ngjashëm. 25-vjeçari, i cili luan me Borussia Monchengladbach po shkëlqen në këtë fillim sezoni dhe paraqitjet e tij kanë rënë në syrin e shumë klubeve. Të parët që interesohen për autorin e 7 golave dhe 4 asisteve në 9 takime të Bundesligës, janë verdhezinjtë e Borussia Dortmund. Klubi nga “Signal Iduna Park” synon të përsërisë të njëjtin sukses që pati me Marco Reus, të cilin e transferuan po nga Monchengladbach në vitin 2009. Mes klubeve ende nuk kanë nisur bisedimet, por shumë shpejt Dortmund pritet të nisë një ofensivë për mesfushorin e avancuar.
