Në mesjavë preku fundin me atë humbje 3-0 në Champions ndaj PSG-së, duke mos gjuajtur asnjëherë në kuadrat, por Reali i Madridit ia doli të ringrihet, duke fituar në një transfertë mjaft të vështirë si ajo ndaj Sevillas.
Në sfidën e zhvilluar në “Ramon Sanchez Pizjuan”, ishte Karim Benzema që vendosi fatin e takimit, me një gol të shënuar në pjesën e dytë, ndërsa Reali mori 3 pikët në kampionat, falë fitores minimale 0-1 ndaj andaluzianëve.
Të besuarit e Zidane u shfaqën shumë më të përqendruar në fushë, duke mos u dhënë shumë mundësi vendasve, ndërsa nga ana tjetër në sulm krijuan disa mundësi të mira shënimi, por vetëm Benzema arriti të mposhtë portierin e Sevillas.
Kjo ishte fitorja e tretë në 5 javë për Realin e Madridit, që u ngjit në vendin e dytë me 11 pikë, aq sa ka edhe Athletic Bilbao i vendit të parë, ndërsa Sevilla mbeti në vendin e tretë me 10 pikë të grumbulluara.
Në sfidat e tjera të javës së pestë të la Ligës, Valencia nuk shkoi më shumë se një barazim 1-1 ndaj Leganezit në “Mestalla”, ndërsa Athletic Bilbao mposhti 2-0 Alaveshin në shtëpi.