6 ndeshje pa fitore ishin tepër dhe për një skuadër si Parma, që, pavarësisht se kishte gjetur qetësinë në tabelën e renditjes, nuk mund të zgjaste më tej serinë e rezultateve negative dhe këtë të shtunë emilianët rigjetën suksesin.
E bënë duke fituar minimalisht ndaj Genoas, që gjithashtu është në mesin e artë të renditjes, falë një goli të Kuçkës në minutën e 78-të, që vendosi për vendasit një ndeshje që verdheblutë meritonin ta fitonin më tepër sesa miqtë.
Në pjesën e parë (38’) Inglese kishte shansin për të zhbllokuar rezultatin, por nga fare pranë gaboi në mënyrë të çuditshme. Ndërkohë që goli i Kuçkës në të 78-ën pati dhe nevojën e konfirmimit nga VAR-i.
Në fund, Gervinho mund të kishte rrumbullakosur me tepër shifrat, por dhe ai u tregua i pasaktë përpara portës (92’). Gjithsesi dhe 1-0 është mjaftueshëm për të marrë 3 pikët, sidomos kur vjen pas 6 ndeshjeve radhazi pa fitore.