Verona mori fitoren e dytë radhazi në kampionat, pasi mposhti mbrëmjen e sotme Genoan me rezultatin 2-1 me përmbysje në stadiumin “Bentegodi” dhe u ngjit në vendin e tetë me 25 pikë, duke lënë pas vetes skuadra si Milani e Napoli.
Të besuarit e trajnerit Juric dominuan takimin thuajse gjatë gjithë 90-minutëshit, por pjesën e parë e mbyllën në disavantazh, pasi kuqeblutë e ardhur nga Genoa gjetën golin me anë të sulmuesit Sanabria.
Në pjesën e dytë Verona gjeti fillimisht barazimin me anë të sulmuesit Verre që ekzekutoi saktë një 11-metërsh, ndërsa më pas shënuan edhe golin e fitores me anë të Zacagnit, duke marrë një 3-pikësh tërësisht të merituar.
Titullarë në këtë takim ishin edhe mbrojtësit shqiptarë Amir Rrahmani dhe Marash Kumbulla, ndërsa te Genoa debutoi mesfushori shqiptar që luan për Zvicrën, Valon Berhami.