Nemanja Matic do të largohet nga Manchester United në fund të sezonit. Me anë të një postimi në Instagram, mesfushori 33-vjeçar ka lajmëruar fansat për fundin e aventurës së tij në “Old Trafford”.
“Pasi u mendova gjatë, vendosa që ky të jetë sezoni im i fundit me Manchester United. Kam njoftuar drejtuesit, trajnerin dhe shokët e skuadrës për vendimin tim.
Ka qenë nder dhe privilegj i madh për mua të luaja për këtë klub të madh. Një falënderim i madh shkon për tifozët për mbështetjen e tyre të palëkundur. Do të jap gjithçka nga vetja deri në ndeshjen e fundit”, shkruan Matic.
Lojtari ballkanas u transferua në vitin 2017 nga Chelsea te Manchester United, ekip me të cilin humbi një finale të FA Cup (2018) dhe Europa League (2021), ndërkohë që realizoi katër gola në 183 ndeshje.
