Empoli mposhti 2-0 Cremonesen në një sfidë të cilën Nedim Bajrami dhe Ardian Ismajli e luajtën të plotë dhe Samir Ujkani e ndoqi nga stoli. Skuadra toskane siguroi suksesin e dytë radhazi shtëpiak dhe mori tri pikë të rëndësishme për objektivin mbijetesë.
Momenti kyç i takimit ishte minuta e parë e pjesës së dytë, që solli edhe zhbllokimin e rezultatit. Trajneri Zanetti hodhi në fushë Nicolo Cambiaghin në pushimin mes pjesëve dhe 21-vjeçarit i mjaftuan 17 sekonda për të realizuar golin e tij të parë në Serie A.
Festë e madhe për sulmuesin anësor të Italisë U21. Ai është në pronësi të Atalantës, që vendosi ta huazojë tek Empoli këtë sezon. Cambiaghi gjeti golin e parë në elitën e futbollit italian, ndërkohë që tifozët e Empolit shpresojnë të shijojnë gola të tjerë nga lojtari i talentuar.