Valladolid dhe Almeria në La Liga sezonin e ardhshëm, ndërsa Eibar duhet të luajë finalet e “play-off”. Emocione në javën e fundit të Segunda Division në Spanjë, aty ku tre ekipe garuan deri në sekondat e fundit për dy vendet e para, që të dërgojnë në elitë.
Valladolid mposhti 3-0 Huesca dhe ndau vendin e parë me Almerian me nga 81 pikë. Këta të fundit nuk shkuan më shumë se barazimi 2-2 në fushën e Leganes, por festuan falë gafës fatale të rivalëve.
Eibar u mposht 1-0 në fushën e Alcorcon, skuadrës që renditet në vend të fundit, dhe tashmë do të luajë në “play-off”, njësoj si Las Palmas i Armando Sadikut, që festoi pas fitores 0-1 në Gijon.
