Në një mbrëmje perfekte në “Parc des Princes”, Angel Di Maria i dha fund aventurës së tij 7-vjeçare te PSG-ja, ku fitoi plot 18 tituj kampion dhe u bë futbollisti me më shumë asiste në historinë e klubit francez.
Argjentinasi 34-vjeçar e nisi nga minuta e parë sfidën dhe tregoi aftësitë e tij asistuese në minutën e 25-të, kur me një pasim perfekt, shërbeu për Mbappe, që shënoi golin e parë të ndeshjes.
Në pjesën e dytë, ylli argjentinas gjeti edhe vetë golin, pasi ndoqi një aksion të Messit dhe shtyu në rrjetë topin e kthyer nga shtylla, për të festuar më pas me shokët e skuadrës dhe tifozët.
Në minutën e 75-të, trajneri Pochettino i dhuroi mundësinë e një “standing ovation”-i, pasi e zëvendësoi, me Di Marian që la fushën e lojës mes lotësh, duartrokitjesh e përqafimesh nga shokët e skuadrës.
Tani ylli argjentinas po përgatitet për një tjetër eksperiencë në Europë, teksa ofertat janë të shumta, por klubi italian i Juventusit është më pranë të tjerave.