Barcelona nuk ndalet as përballë Sevillas. Skuadra e Xavit dominoi sfidën ndaj andaluzianëve në “Camp Nou”, por realizoi vetëm një gol. Perla e Pedrit në minutën e 74-t i dhuroi Barcelonës suksesin e gjashtë radhazi në La Liga dhe vendin e dytë.
Ndeshja dhuroi emocione dhe nisi me katalanasit në sulm. Ferran Torres dhe Frenkie De Jong iu afruan golit, teksa provoi edhe Jordi Alba. Në fundin e pjesës së parë tentoi edhe Pierre-Emerick Aubameyang, por Bono priti në dy kohë.
Vendasit nuk e ulën ritmin në pjesën e dytë, fraksion ku e kërkoi golin edhe Sevilla. Ocampos dhe Lamela u shfaqën të rrezikshëm për ekipin e Lopeteguit, ndërsa Barcelona u përgjigj me Ferran Torres dhe Araujon.
Ivan Rakitic provoi në krahun tjetër, ndërsa Bono dhe traversa i hoqën golin Gerard Pique. Tentoi edhe Dembele fluturimthi, por topi mbi tra. Gjithsesi, tifozët përjetuan emocione në minutën e 74-t.
Pedri dhuroi “show” dhe gjeti cepin e portës kundërshtare me një gjuajtje të saktë nga larg. Festë në “Camp Nou”, çlirim i madh për Xavin dhe 1-0 për Barcelonën, që menaxhoi mirë minutat e mbetura dhe festoi suksesin e radhës.
[quiz-cat id=”297576″]
