Barcelona i jep leksion futbolli Realit të Madridit në finalen e Superkupës së Spanjës, që u zhvillua në Riad të Arabisë Saudite. Katalanët, rekordmenë e këtij torfeu, fituan 3-1 në këtë “El Clasico”, duke dominuar në çdo aspekt ndaj rivalit historik, që e pati të vështirë të ngrinte kokë që pas golit të shënuar nga Gavi në minutën e 33-të.
Dominimi i katalanëve, shumë më energjikë dhe të qartë në lojën e tyre, u reflektua me golin e dytë të shënuar nga Lewandowski pa u mbyllur pjesa e parë.
Reali, pavarësisht ndërrimeve të kryera nga Ancelotti e pati të pamundur të ngrinte kokë, madje “blaugranat” shënuan edhe golin e tretë me Pedrin në minutën e 69-të. Në kohën shtesë realizoi golin e nderit Benzema, por që vlejti për statistikë.
Real – Barcelona 1-3
Shënues: Gavi 33′, Lewandowski 45′, Pedri 69′
90+3′ – Zgjohet vonë Reali i Madridit. Benzema arrin të shënojë golin e nderit pak sekonda pasi gjyqtari të vërshëllente për përfundimin e finales, 1-3
69′ – Kapitullon Reali! Tjetër kundërsulm vrastar i Barcelonës me Lewandowskin që pason për Gavin, ky i fundit për Pedrin, që e ka të lehtë të tundë rrjetën në shtyllën e dytë, 0-3
51′ – Pranë golit të tretë Barça, Courtois i mohon golin Dembelesë.
45′ – Mbyllet me një tjetër gol për Barçën pjesa e parë e finales së Superkupës. Një zgjatje e De Jong nxjerr të lirë Gavin, i cili pason për Lewandowskin, që vetëm mund ta shtyjë topin drejt rrjetës, 0-2.
33′ – Vijon spektakli në “El Claciso”. Barcelona përfiton nga shpërqendrimi i mbrojtjes së Realit, që gabon në organizimin e lojës, duke i dhë mundësinë Gavit të mposhtë portierin Courtois, 0-1.
12′ – E nis me vrull Barcelona, që në minutën e 12-të godet shtyllën me Lewandowskin, ndërsa Balde, në vijim të aksionit godet jashtë.
