Është ndalur pas dy fitoreve radhazi, ecuria pozitive e Brighton në Premier League. Të besuarit e trajnerit italian De Zerbi, u mposhtën në shtëpi me rezultatin 1-2 nga Aston Villa. Në fakt, ndeshja nisi në mënyrën më të mirë të mundshme për vendasit që kaluan në avantazhin që në minutën e parë me anë të Mac Allister.
Gjithsesi, me kalimin e minutave miqtë e morën veten dhe rikthyen baraspeshën në minutën e 20-të teksa Danny Ings ekzekutoi saktësisht një 11-metërsh. Fraksioni i parë u mbyll në barazim, ndërsa në të dytën ishte sërish ish-sulmuesi i Liverpool që ndëshkoi Brighton.
Këtë herë Ings realizoi në të 54-tën pas një asisti të Douglas Luiz teksa Aston Villa më e menaxhoi më së miri avantazhin duke u kthyer në shtëpi me tre pikët e plota. Ishte fitorja e dyta radhazi për të besuarit e trajnerit Unai Emery që tashmë ngjitet në kuotën e 15 pikëve në vend të 15-të. Nga ana tjetër, Brighton mban vendin e shtatë me 21 pikë.
