Rrugëtimi i Besiktasit në Kupën e Turqisë u ndërpre në raundin e 1/8-ve. Bardhezinjtë nga Stambolli u eliminuan nga Ankaragucu i Ali Sowe, që kaloi në çerekfinale falë goditjeve të penalltive.
Koha e rregullt përfundoi në barazim 1-1. Ish-sulmuesi i Skënderbeut kaloi Ankaragucu në avantazh në minutën e 12’, por Besiktasi barazoi takimin 13 minuta përpara fundit.
Shtesat nuk prodhuan gol dhe skuadrat iu drejtuan penalltive. Ali Sowe realizoi penalltinë e tij, ndërkohë që lojtarët miq gabuan dy herë nga pika e bardhë.
28-vjeçari nga Gambia ishte pjesë e Skënderbeut në sezonin 2017-2018. Sowe fitoi titullin kampion në Korçë dhe u shpall golashënuesi më i mirë në Superiore (21 gola).
Lojtari afrikan dha kontribut të madh në kualifikimin e bardhekuqve për herë të dytë në fazën e grupeve në Europa League.