Edin Dzeko shënon dy herë në portën e Sassuolos dhe rikthen Interin te fitorja në kampionat, pas dy humbjeve radhazi të zikaltërve. Sulmuesi boshnjak shënoi në fundin e pjesës së parë dhe më pas në të 75-ën, duke shkuar në kuotën e 101 golave në Serinë A, ndërsa zikaltrit u larguan me 3 pikë mjaft të vlefshme nga transferta ndaj Sassuolos në “Mapei Stadium”.
Pjesa e parë ishte e balancuar, me Interin që kishte më shumë iniciativë, por pa krijuar raste të mira shënimi, teksa sfida u zhbllokua në të 45-ën me anë të Dzekos, që përfitoi nga një rrëmujë në zonë, për të shtyrë topin në rrjetë.
Në pjesën e dytë Inzaghi nuk riktheu më në fushë Asllanin, për shkak të një kartoni të verdhë të marrë që në minutën e 19’, ndërsa në të 60-ën Fratessi u harrua në zonë nga mbrojtja zikaltër dhe riktheu baraspeshën.
Interi nuk mund të pajtohej kurrsesi me rezultatin dhe zhvendosi lojën në gjysmëfushën e zijeshilëve, teksa në të 74-ën ishte Lautaro që goditi portën, por Consigli i mohoi golin, duke e grushtuar topin në këndore.
Vetëm një minutë më vonë, Mkritaryan gjeti sërish Dzekon në zonë dhe boshnjaku shënoi golin e dytë personal, duke i dhënë tre pikët Interit, që ngjitet në kuotën e 15 pikëve, momentalisht në vendin e 7, por ende larg kreut.
Goli i dytë i Dzekos:
Goli i parë i Dzekos:
Formacioni i Interit (3-5-2): Onana; D’Ambrossio, Acerbi, Bastoni; Dumfries, Barella, Asllani, Calhanoglu, Dimarco; Lautaro, Dzeko.
