Borussia Dortmund nuk e vendosi për asnjë moment në dyshim suksesin përballë Stuttgart në ndeshjen e javës së 11-të në Bundesliga. Verdhezinjtë triumfuan me rezultatin e thellë 5-0, teksa tre gola i shënuan që në pjesën e parë duke i lënë shumë pak hapësirë miqve për të tentuar një rezultat pozitiv. Ai që zhbllokoi shifrat e takimit ishte talenti Jude Bellingham në minutën e dytë, ndërsa në të 13-tën dyfishoi mbrojtësi Sule. Sakaq, një minutë para përfundimit të pjesë së parë, Reyna realizoi edhe të tretin.
Në fraksionin e dytë, vendasit nuk hoqën dorë nga loja ofensive dhe sërish Bellingham në të 53-tën realizoi golin e katërt të sfidës dhe të dytin personal. Ndërkohë, në fund ai që vulosi fitoren 5-0 ishte Moukoko në minutën e 72-të teksa pas këtij suksesi, verdhezinjtë ngjiten në kuotën e 19 pikëve në vend të katërt ndërsa Stuttgart mbetet në vendin e 16-të me 8 pikë.
Nga ana tjetër, Bayern Munich festoi në transfertë aty ku mposhti Hoffenheim me rezultatin 0-2.Bavarezët e zgjidhën ndeshjen në pjesën e parë falë golave të Musiala dhe Choupo Moting ndërsa në fraksionin e dytë, menaxhuan më së miri avantazhin duke mos i lënë mundësi kundërshtarëve. Falë fitores së dytë radhazi, rekordmenët gjermanë ngjiten në kuotën e 22 pikëve, në vend të dytë, një pikë më pak se kryesuesit e Union Berlin. Ndërkohë, Hoffenheim mbetet në vend të gjashtë me 17 pikë të grumbulluara.
Në ndeshjet e tjera të Bundesligës, Augsburg dhe Leipzig prodhuan një barazim spektakolar 3-3, në barazim 2-2 u mbyll edhe Bayer Leverkusen-Wolfsburg ndërkohë që Freiburg mposhti 2-0 në shtëpi, Werder Bremen.