Një gol i Rafael Leaos i dhuroi fitoren 1-0 Milanit ndaj Fiorentinës në një “San Siro” me mbi 71 mijë tifozë kuqezinj. Portugezi përfitoi nga një largim i topit i pasaktë nga ana e portierit Terracciano tetë minuta përpara fundit të ndeshjes.
22-vjeçari nuk fali, dërgoi topin në rrjetë dhe gjeti golin e dhjetë sezonal në Serie A, duke u bërë portugezi i pestë që arrin numrin dyshifror të golave në kampionatin italian dhe i pari që ia del pa mbushur 23 vjeç.
Theo Hernandez shënoi në minutën e shtatë, por goli ishte i parregullt. Oliver Giroud pati një shans të artë në pjesën e parë pas asistit të Kessie, por u ndal nga portieri Terracciano.
Stefano Pioli hodhi në fushë Ibrahimovic dhe Rebic në pjesën e dytë. Maignan mbajti kuqezinjtë në lojë në minutën e 76-të me një pritje fantastike ndaj goditjes me kokë të Cabral.
Për t’i dhënë Milanit triumfin e tretë radhazi mendoi Leao, i cili realizoi golin që afron ekipin e famshëm me titullin kampion. Diferenca me Interin (ka luajtur një ndeshje më pak) ka shkuar 5 pikë dhe Milanit i nevojiten 7 pikë në tre takimet e mbetura, për të nisur festën e titullit, që në Milanello mungon prej 11 vitesh.
