Granada nuk ia doli të marrë pikët maksimale në shtëpi përballë Celta Vigos. 1-1 përfundoi sfida e luajtur në “Nuevo Los Carmenes”. Myrto Uzuni e nisi si titullar ndeshjen për ekipin vendas, luajti 76 minuta dhe nuk la gjurmë në këtë përballje.
Emocionet ishin ruajtur për në 20 minutat e fundit. Ekipi galician kaloi në avantazh në pjesë në minutën e 72-të falë autogolit të Antonio Puertas. Granada u hodh në sulm në kërkim të golit të barazimit, që e gjeti në minutën e dytë shtesë të ndeshjes.
Luis Milla devijoi topin në rrjetë dhe në stadium shpërtheu festa, ndërkohë që nuk kishte më kohë për golin e fitores. Barazimi i sotëm mban Granadën në vend të tretë nga fundit me 31 pikë, vetëm një më pak se Cadizi dhe Mallorca, me ekipin e Muriqit që ka luajtur një ndeshje më pak.
