Një ndeshje boksi e zhvilluar në Californi mes Ruben Torres dhe Cristian Baez ka nxitur reagime të shumta në komunitetin sportiv duke qenë se Torres fitoi ndeshjen në raundin e shtatë pasi me një goditje dinake shtriu përtokë kundërshtarin e papërgatitur.
Befasisht, sapo nisi raundi i shtatë, Baez afrohet në mes të ringut për të përplasur dorezat para se të niste dyluftimi mirëpo Torres gjen mundësinë me kundërshtarin e pambrojtur dhe e godet duke e hedhur në tokë. Arbitri i jep fitoren Torres ndërsa edhe gjyqtarët e konsiderojnë të rregullt me Torres që ia doli të ruante statusin e të pamposhturit në kategorinë e peshave të lehta.
Pas sfidës, Torres theksoi se rregulli numër një i boksit është që duhet të ruhesh gjithmonë dhe të qëndrosh vigjilent ndaj kundërshtarit. Megjithatë, ky veprim ka hapur diskutime të shumta në rrjetet sociale nëse gjesti i Torres mund të konsiderohet si një zgjuarsi taktike apo një hile që nuk mund të aprovohet dhe të kalojë pa u ndëshkuar.
Gjithsesi, interesant është fakti se veprimi dinak i Torres nuk është i pari në historinë e boksit, pasi në një mënyrë të ngjashme edhe Floyd Mayweather nxorri K.O, Ortiz në vitin 2011.