Juventusi rigjen fitoren në Serie A, teksa Lyoni vazhdon të vuajë në Ligue 1. Bardhezinjtë italianë nuk siguronin 3 pikë në kampionat që prej triumfit të 31 gushtit 2-0 ndaj Spezias. Ekipi i Max Allegrit mposhti 3-0 Bolognan e Thiago Mottas.
Filip Kostic finalizoi saktësisht një kundërsulm në minutën e 24-t, duke gjetur golin e parë me Juventusin. 29-vjeçari mori një asist nga bashkëpatrioti Dusan Vlahovic dhe mposhti portierin me një diagonale të saktë.
Kaq për pjesën e parë, ndërkohë që në 45 minutat e fundit e gjetën rrugën e rrjetës edhe Vlahovic e Arkadiusz Milik. I pari realizoi me kokë (59’), teksa polaku shënoi një gol shumë të bukur në minutën e 62’.
Lyoni doli pa pikë nga transferta me Lensin. Vendasit fituan 1-0 falë një penalltie të saktë të Florian Sotoca 12 minuta përpara fundit. Ky suksese ka ngjitur Lensin në vend të katërt me 21 pikë, ndërkohë që Lyoni regjistroi humbjen e katërt në nëntë javë.