Fitore në transfertë për Leicester City në Premier League, ndërkohë që Werder Bremen siguroi suksesin e dytë radhazi në Bundesliga. “Dhelprat” e Brendan Rodgers mposhtën 0-2 Evertonin në “Goodison Park” falë dy golave shumë të bukur në fundin e çdo pjese.
Youri Tielemans zhbllokoi ndeshjen me një eurogol në minutën e 45’, teksa në minutën e 86’ Harvey Barnes gjeti golin e qetësisë për ekipin mik duke finalizuar një kundërsulm perfekt. Me fitoren e sotme, Leicesteri i bashkohet Evertonit në kuotën e 14 pikëve.
Werder Bremen mori pikët maksimale në shtëpi pas triumfit 2-1 ndaj Schalke 04. Miqtë gjetën golin në minutën e 16’ me anë të Alex Kral, por VAR-i anuloi festën e “Bluve Mbretërorë”. Vendasit përfituan dhe kaluan në avantazh me Niclas Fullkrug pas gjysmë ore lojë.
Werderi dyfishoi rezultatin në minutën e 76’, Marvin Ducksch dërgoi tifozët e pranishëm në “Weserstadion” në festë, teksa goli i Dominick Drexler (89’) i shërbeu vetëm për statistika Schalkes. Vendasit janë ngjitur në vendin e shtatë me fitoren e sotme, ndërsa Schalke mbetet në vendin e fundit në Bundesliga.
