Kur mbetet edhe një javë nga fundi i kampionatit, titulli i Bayern Munich është më shumë se kurrë në diskutim teksa bavarezët u mposhtën në shtëpi nga Leipzig me shifrat 1-3. Në fakt, ndeshja nisi mirë për skuadrën e drejtuar nga trajneri Thomas Tuchel duke qenë se kaluan të parët në avantazh me anë të Serge Gnabry në minutën e 25-të.
Gjithsesi, miqtë e morën shpejt veten dhe i shpëtuan goditjes në aspektin psikologjik, edhe pse rezultati i pjesës së parë nuk ndryshoi. Në fraksionin e dytë, Leipzig nisi të mendonte më shumë për aspektin sulmues dhe ia doli fillimisht të barazonte rezultatin me anë të Laimer në minutën e 65-të.
Por, nuk përfundoi me kaq pasi 11 minuta më pas, Leipzig gjeti edhe golin e përmbysjes me anë të Nkunku që shënoi nga pika e bardhë e penalltisë.
Lexo edhe:
- Ballkani zyrtarisht kampion i Kosovës, shpërthen festa në Therandë
- VIDEO/ Fitore jetike pas 7 javësh, sulmuesi dardan protagonist me gol
- “Më ka thirrë Atdheu”, Ballistët karikojnë Kombëtaren: Gati për Tiranë
- Marca zbulon Uzunin, rrëfimi në 360 gradë i sulmuesit: Përballja me Ronaldon dhe premtimi ndaj vetes!
Në vijim, bavarezët tentuan të rikthenin baraspeshën, por ishin sërish miqtë që fituan një tjetër 11-metërsh pas topit të prekur me dorë nga ana e Mazraoui. Nga pika e bardhë, Szoboszlai nuk gaboi dhe shënoi të tretin duke siguruar tre pikët, por edhe zonën Champions një javë para fundit të kampionatit duke qenë se renditet në vendin e tretë me 63 pikë.
Nga ana tjetër, Bayern mbetet në vendin e parë me 68 pikë, një më shumë se Borussia Dortmund ndërsa duhet theksuar se fatet e kampionatit tashmë nuk janë më në duart e bavarezëve teksa verdhezinjtë mund t’i parakalojnë në ndeshjen e së dielës ku përballen në transfertë me Augsburg.
