Mbrëmje magjike për Mauro Icardin, që vulos i vetëm fatin e derbit të Stambollit. Pasi ka lënë pas krahëve problemet familjare, sulmuesi argjentinas është kthyer të bëjë atë që di më mirë, teksa ka dërguar dy herë topin në rrjetën e portës së Besiktas dhe i ka dhënë fitoren 2-1 Galatasarayt.
Goli i parë i argjentinasit u shënua në minutën e 18’, me një goditje “bombë” me të majtën, teksa topi shkoi në rrjetë me një shpejtësi prej 112km/h, duke mos i dhënë asnjë mundësi reagimi portierit kundërshtar.
Pjesa e parë u mbyll në barazim, pas golit të Cenk Tosun, megjithatë në të dytën Icardi shënoi sërish, këtë herë me kokë, ku shfrytëzoi një kros të portugezit Oliveira dhe i vodhi kohën mbrojtjes kundërshtare, për të devijuar topin në rrjetë.
Kjo ishte dopieta e parë në Turqi për Icardin, që ngjitet në kuotën e tre golave të shënuar me Galatasarayn, ekip ku u transferua në huazim verën e kaluar.
