Interi mposhti 3-0 Milanin në finalen e Superkupës së Italisë, duke fituar trofeun për herë të dytë radhazi dhe herë të shtatë në histori, po aq sa rivalët e Milanit. Zikaltrit e Simone Inzaghit dominuan kampionët e Italisë dhe nuk e vendosën në asnjë moment në diskutim fitoren.
Interi e nisi ndeshjen në sulm dhe e pa veten në avantazh të dyfishtë brenda 21 minutave. Federico Dimarco zhbllokoi takimin (10’) pas një asisti nga Nicolo Barella, ndërkohë që Edin Dzeko realizoi një gol të bukur, pasi kreu një driblim dehës ndaj Sandro Tonalit.
Goli i tretë ishte edhe më i bukur. Minuta e 77’, stopim i bukur dhe rrotullim ndaj Fikayo Tomorit nga ana e Lautaro Martinez, i cili mposhti portierin Tatarusanu me një gjuajtje plot klas. Milani bëri gjithçka keq dhe e meritoi humbjen, ndërkohë që Interi nisi festën në stadiumin “King Fahd International Stadium”, Riad, Arabia Saudite. Kristjan Asllani u fut në fushë në minutën e 84’.
SUPERKUPA E ITALISË
MILAN-INTER 0-3 (Dimarco 10′, Dzeko 21′, Lautaro Martinez 77′)
Kronika e ndeshjes:
77′ Gooooooooooooooool. Realizim fantastik nga ana e Lautaro Martinez. Sulmuesi argjentinas rrotullon Fikayo Tomorin dhe mposht Tatarusanu me një goditje plot klas.
21′ Goooooooooool. Interi gjen edhe golin e dytë. Fantastik Edin Dzeko, i cili tundi rrjetën pas driblimit ndaj Sandro Tonalit.
10′ – Goooool. Aksion perfekt i Interit, qe shkon në zonën kundërshtare, aty ku Dimarco e ka të lehtë të mposhtë portierin Tatarusanu, Zikaltrit në avantazh.
Milan-Inter është finalja numër 35 e Superkupës së Italisë dhe e treta mes këtyre dy skuadrave. Derbi i zjarrtë i Milanos është transferuar në Riad të Arabisë, aty ku skuadrat e Stefano Piolit dhe Simone Inzaghit do të përballen mes tyre për fitimin e trofeut, sfidë që do transmetohet në SuperSport 2 (20:00).
Dy trajnerët kanë përzgjedhur titullarët e finales së sotme. Pioli ka preferuar Kjaer përpara Kalulu si kolegu i Tomorit, ndërkohë që Giroud do të mbështetet nga treshja Leao-Brahim Diaz-Messiah. Zikaltrit rigjejnë Barellën në mesin e fushës, i vetmi ndryshim krahasuar me titullarët që luajtën përballë Hellas Verona në kampionat. Kristjan Asllani në stol, me mesfushorin shqiptar që shpreson të marrë minuta gjatë ndeshjes.