Chaker Alhadhur është mbrojtës i majtë i AC Ajaccio dhe ka shok skuadre mesfushorin e kombëtares shqiptare, Qazim Laçi, teksa mbrëmjen e djeshme tregoi se ka ngatërruar rol, pasi mund të kishte bërë një karrierë shumë më të mirë si portier.
Futbollisti 30-vjeçar u detyrua të veshë dorezat dhe të luajë në portë, në ndeshjen e vlefshme për fazën e 1/8-ave të Kupës së Afrikës, pasi Komorosi i tij ishte në emergjencë, me dy portierë të prekur nga koronavirusi dhe një tjetër të dëmtuar.
Përballë Kamerunit organizator dhe favorit për të ngritur trofeun, ishte gati-gati e pamundur që Komoros të bënte surprizën, megjithatë mbrojtësi i shndërruar në portier u bë protagonist absolut.
Alhadhur ishte një siguri në lojën me këmbë dhe këtë e shfrytëzuan maksimalisht shokët e tij të skuadrës, që e kishin si një mbrojtës më tepër aty mes shtyllave, teksa 30-vjeçari bëri edhe disa dalje mjaft të bukura e vendimtare, duke marrë duartrokitjet e publikut.
Edhe reflekset e Alhadhur ishin të krahasueshme me ato të portierëve të niveleve të larta, pasi në të paktën 3-4 raste të pastra, 30-vjeçari u hoqi kënaqësinë e golit kamerunasve.
Këta të fundit ia dolën të fitojnë 2-1 dhe të kalojnë në çerekfinale, ndërsa Alhadhur duket se do ta mendojë mirë pozicionin e tij në fushë, pasi të rikthehet te Ajaccio…
[quiz-cat id=”297386″]
