PSG koleksionoi fitoren e katërt radhazi në Ligue 1, teksa kryeqytetasit mposhtën në transfertë me rezultatin 1-2, skuadrën e Lorient. Në fakt, ishte një fitore e vuajtur për të besuarit e trajnerit Christophe Galtier, edhe pse ishin ata që kaluan të parët në avantazh me anë të Neymar në minutën e nëntë.
Sulmuesi brazilian u shfaq në brendësi të zonës dhe nga një pozicion tejet i favorshëm nuk mund të gabonte. Gjithsesi, vendasit nuk e humbën qetësinë dhe pak nga pak u futën në ritmin e duhur teksa barazimin e gjetën vetëm në minutën e 53-të të pjesës së dytë me anë të Moffi.
Nga ana tjetër, PSG u duk sikur nuk kishte forcën e duhur për të shënuar sërish, por Danilo shfrytëzoi një harkim të Neymar dhe riktheu skuadrën në avantazh. Një avantazh të cilin parizienët e mbrojtën deri në fund dhe pas këtij triumfi, mbeten të parët me 38 pikë, pesë më shumë se ndjekësit më të afërt, Lens. Ndërkohë, Lorient pas humbjes së dytë radhazi, mbetet në vendin e katërt në renditje me 27 pikë.