PSG nuk ia ka dalë të marrë tre pikët e plota nga transferta me Lyon. Ndeshja e zhvilluar në stadiumin Parc Olympique Lyonnais u mbyll në barazimin 1-1. Të dyja skuadrat shënuan nga një gol për pjesë, teksa në të parën ishin vendasit ata që realizuan me anë të Paqueta në minutën e shtatë. Parisienët provuan vazhdimisht, por Mbappe i mungoi fati teksa në një moment goditja e tij brenda zonës u ndal nga shtylla.
Megjithatë, në fraksionin e dytë, të besuarit e trajnerit Mauricio Pochetino ia dolën të gjenin rrugën e rrjetës me anë të Kehrer në minutën 76, ndërsa në vazhdim të sfidës, miqtë provuan ta fitonin atë. Por, sërish u konfirmua se nuk ishte mbrëmja më me fat për Mbappe, i cili edhe njëherë u ndal nga shtylla, këtë herë teksa ekzekutoi mjeshtërisht një goditje dënimi.
Kështu, rezultati mbeti i pandryshuar deri në fund, teksa pas kësaj sfide, PSG mbetet në vendin e parë të klasifikimit me 47 pikë, ndërsa nga ana tjetër, Lyon renditet në vendin e 11 me 25 pikë të grumbulluara pas 19 javësh të luajtura.