Real Madrid siguroi biletën për në finalen e Superkupës së Spanjës teksa në Arabinë Saudite, në ndeshjen e luajtur përballë Valencias u deshën goditjet e penalltive për të shpallur fituesin duke qenë se 90 minutat u mbyllën në barazim 1-1. Në atë që konsiderohet si “ruleta ruse”, madrilenët u treguan të saktë duke mos gabuar në asnjë penallti ndërsa nga ana tjetër, te Valencia u gabuan dy 11-metërsha.
Sa i takon pjesës së parë, Real Madrid kishte iniciativën me madrilenët që tentuan në dy raste me Karim Benzema fillimisht e më pas me Ernesto Valverde që iu afrua golit me një goditje nga jashtë zone dhe që shkoi ngjitur me shtyllën e mbrojtur nga portieri Mamardashvili. Gjithsesi, mundi i të besuarve të trajneri Carlo Ancelotti do të shpërblehej në minutën e 39-të kur Benzema shndërroi në gol një penallti të fituar nga vetë francezi pas një ndërhyrje të gabuar të Comert.
Me avantazhin e Realit u mbyll pjesa e parë, ndërsa në fraksionin e dytë, Valencia tregoi menjëherë forcë dhe barazoi shifrat falë golit të Lino. Ky i fundit shfrytëzoi në maksimum një harkim të Lato dhe nuk fali nga fare pranë portës duke mposhtur portieri Courtois.
Në vijim, skuadrat provuan ta fitonin ndeshjen mirëpo mungoi saktësia dhe finalizimi me sfidën që u desh t’i drejtohej kohës shtesë. Në fakt, edhe 30 minutat e shtesë nuk rezervuan asnjë të re dhe në këtë formë, skuadrat iu drejtuan goditjes së penalltive.
Nga pika e bardhë, ishin Los Blancos ata që u shfaqën më të saktë dhe shënuan katër penallti na dy të Valencias. Tashmë në finale, Real pret fituesen e çiftit Barcelona-Betis.
